Анонс КВНа на бурятском языке
Главная / Новости /Общество / Иимэ буряад хэлэ хэншье ойлгохо
Иимэ буряад хэлэ хэншье ойлгохо
01-11-2016
Ноябриин 10-да Улаан-Үдэдэ буряад хэлэн дээрэ ээлжээтэ КВН үнгэрхэнь. Тус наадан КВН – нэй бии болоһоор 55 жэлэй ойн баярта дашарамдуулагдана.
— 2014 оной март һарада түрүүшын КВН-наада тон түрүүшынхиеэ буряад хэлэн дээрэ эмхидхээ һэмди. Тиихэдэ Шэтын “Гураны” болон Улаан-Үдын “Хара Морин” ба “Евровидение” гэһэн гурбан команда хабаадаа бэлэй. Тиихэдэ энэ нааданда харагшад үсөөн ерээһэн. Удаань буряад хэлэн дээрэ КВН аргагүй һонирхолтой юм гэжэ ойлгоһон хүн зон үшөө дахин энэ хэмжээгээ үнгэргэхыемнай гуйһан байна. Тиигэжэ намартаа шэнээр наада харуулхадамнай, 10 команда хабаадаха хүсэлтэйгөө мэдүүлээ. 2015 оной намар аяар 19 команда мэдүүлгэ үгэһэн аад, 12-ынь лэ нааданда хабаадаа, — гэжэ Буряад орондо КВН наада эмхидхэгшэ Чингис Болотов хөөрэнэ.
Чингис Болотовой хэлэһээр, буряад хэлэ һайнаар мэдэдэггүй хүнүүдшье КВН һонирхожо харана. Энэ наадан бүхы дэлхэй дээрэ олоной зүрхэ сэдьхэл буляана. Ушарынь гэхэдэ, ород-буряад үгэнүүдые холижо, худхажа хөөрэлдэхэдэ, хүн зондо һонин ха. “Иимэ буряад хэлэ хэншье ойлгохо” гэһэн үгүүлэлэй бии болоһониинь гайхалгүй.
Энэ КВН-дэ хабаадаха гэбэл, ноябриин 5 болотор мэдүүлгэ үгэжэ болохо.
Борис БАЛДАНОВ
